حيطان الحلم

حيطان الحلم

فوق حيطان الحلم

شبكت حلمي بدبوس

طلع ملوبس

بالخوف والخضة

اسم الحلم

وطن منحوس

فوق حيطان الوطن

قطعت أحلامي

نبت مكانها كابوس

فوق حيطان الخوف

شوفت الوشوش

واكل نصها السوس

لما بصيت للسما

لأ

مشوفتش غيمة كبيرة

شوفت على إمتداد البصر

جناح أسود بينزف دم

اتجمع في كوبيتي مخلوط بالهم

غربانهم واقفة هناك

تمصمص أحزانا بصوت مسموع

ترمي بواقي صبرنا

ع الأرض البور

لجل يطرح جيل

بالشقا معجون

شوفت الأيادي السود

تمسح من شفاينا

أي أثر للبسمة

تكوي في عيونا فرحة أمل جاية

تضغط على قلوبنا؛ تموت الضحكة

تبدل ملامحنا

وتخنق الغاية

وتخلي الغواية

لطريقنا دليل

تخلي الضلمة في عيونا نور

على حيطان الحلم

ساحت آمالنا

مسحوها بإيديهم

وسابوا على الحيطان

وطن منحوس!