صوتي

صوتي

صوتي...صوت مجروح من الخضة

أنا اللي قلبت الفكرة وهزيتها

فارت في وشي منهزمة

شِد السطر من أوله

ممكن تسقط حروفه

فتعرف أن الفكرة مش متأصلة

دي يا دوبك لابسة غويشة وأسوِرة

الفكرة أن الفكرة اتبخرت

نصبت طولها فتبعترت

فلازمن يكون صوتي مجروح

مجروح من إيه

يا سيدي ما قولت لك

جرحته الحداية اللي اسمها الخضة

متتخضش

متتوقعش

أنك ممكن متُقعش

صحيح أنك بهلوان على السطر

بس السطر ممكن يميل

يزحلق حروفه وتوه ملامحك

وسط الحروف

تقع على سن القلم موجوع

مفزوع من غياب الفكرة

حاول تدور ع فكرة ثابتة

تدور حواليها الشمس

والكواكب مدا الكفوف تتحنى

من فكرة ربما مختلة

وربما ثابتة!

ولكن نفسها الصاعد بيأكد

أن الصراع مفروض

ما بين فكرة شايفنها ماسخة

وفكرة معلقين عليها دبابيس الأمل

متصورين بيقين يوزن جبل

أنها...

ممكن....

محتمل....

جايز تكون....

راسخة!

سيبك من ده كلام متفلسف

أصل دي حروف حابة تتزخرف

تتحط في فاترين العقول

لعل شاري يتدبس

يقنع نفسه أنه راح يلبس

فكرة متأنتكة بفيونكة تهوس

بس أنت غاوي تتفلسف

يووووه من كلامك

غاوي يعني تتأستذ

مش بقولك أن صوتي...

صوت مجروح من الخضة