رباعيات متشربة بالغم

رباعيات متشربة بالغم

أنا الحقيقة اللي ناوية تموت

أنا كدبة اتغطت بورق التوت

أنا الفرحة اللي ناوية تهاجر

أنا الدمعة اللي حالفا تفوت

وعجبي

هي البسمة اللي عايزة حبيب

هي حلم أتولد ف بحر الغيب

هي نور بيلالي بلا مواعيد

هي فجر بعيد وظني قريب

وعجبي

هو ترك وراه الفرحة يتيمة

هو اللي زرع بخطاه الغيمة

هو اللي فتح ضلوعه للريح

هو ظنه إن الريح رحيمة

وعجبي

هما اللي علموني الكدبة

هما اللي قتلوا فيها البسمة

هما اللي بعتولوا الريح

هما اللي دفنوا الفرحة

وعجبي

أحنا اللي سكتنا عليهم

أحنا اللي ضحكنا ليهم

أحنا مسنتهلش هو وهي

أحنا كفنا كرباج يصليهم

وعجبي