شايف وشوش

(1)

شايف وشوش

من بعيد شايف وشوش

معجونة بالخوف والقهر

وعارف أن وشي محفور

في حيطة طوبها قديم

بينزف ملل وتقل دم

(2)

مرهونة حياتي بخيط طويل

ساعات بيتمايل ويتجن

خبيت نفسي جوا نفسي

وشمشمت على الأيام

اللي سرح فيها الغم

(3)

المشاعر بقى لونها غريب

زي اللمبة الصفرا كئيب

وحدفت صوتي بعيد

رجع لي محشور بالحزن

وكلامي طالع متشخبط

يجري... يقع... يتخبط

(4)

العود بيعزف صوت مكتوم

والوتر اللي كان مشدود

اتنطط وصبح مبروم

والنوتة بقراها معكوسة

والنغمة فيها محفوظة

(5)

بجري برجل عارجة

بجري قبل سواد الليل

ما يغطي آخر حتة

من نور السما السارحة

(6)

شديت على لساني

طلع صوتي صدى

اتكيت بسناني

على آخر كلمة

بس فلت مني السراج

وخرجت مني باردة

(7)

أصواتهم سكاكين حامية

حفرت نفق عميق

جوا وداني

بتملى قلبي حواديت خايبة

فيها البواخة والشماتة دايبة