شوفتها بعنيا

شوفتها بعنيا

شوفتها بعنيا دول

ستي وهي بتلضم خيوط النور في إبرتها

مش مهم تصدقني

يكفي أني مصدقني!

طب تحب أأكد لك

عملت منه شال مرمر

طيب أضحك

وأسأل ستك

لما كت ستي تقطف الحلم؛ أخضر

وتحطه في الشال المرمر

وترقد عليه شهور

أضحك

أضحك

بعنيا دول شوفت

فراشات

لأ مش من نور...

خليك تتريق

فراشات حواليها بتدور

ترمي في جحورها حبات من ...

أمل

وفرح

وسرور

أسأل ستك

لما كت ستي تمشي ف السوق

تُبدر على روؤس الخلق

حبات من نور

شوفت ف إيديها فرشة بلور

أيوه يا سيدي كانت بلور

حاول تسمع

تشخبط وشوش الناس

تطرح شفايفهم البسمة

والضحكة

وعيون تتفتح على الفرحة

شوفتها بعنيا دول

تفرش سجادة المحبة

ع عتب الدار

تلملم عليها قلوب مكسورة

تحقنها بالضحكة

يطلع لها جناحين

تطير بالدور

ع صوت غنوتها

تقف ع السور

تنقر بمنقارها حبات النور

مش مهم تصدقني

يكفي أني مصدقني