خايبة هي الحكاية

خايبة هي الحكاية

خايبة هي الحكاية

متتصورش في جعبتي

حكاوي أسطورية

أنا ممكن أطّلع لك من جعبتي

شوية طراطير

معنديش تفاصيل مثيرة

وحتى كمان فاقد للبصيرة

كل ما في الأمر

أني رصيت كلمتين

على حجر الشيشة

فوهمك صورلك

أني حنظّرلك

وأرتب لك الكون كله

أفقياً ورأسياً

وإن الكون بيتمدد

وأنا اللي فاكره بيتمطع!

حقيقي أفكاري أبسط

من محاولاتك المبتذلة

لأنك تبروزها وترسمها

أنا النكرة اللي مستني

زقزقة العصافير فوق الشجر

أنا اللي مستني رنة أمل

من وردة لابسة توب الندى

أنا اللي متعشم في حبال الود

أنّشر عليها قلوب صغننة

أنا اللي بيتاوب يطرد ليل

ويتنفس نهار بِكر منتظر

أنا اللي رجلي حصان شايلني

يجري بيا على المجهول

أنا اللي إيديا درع وأنكسر

أنا اللي بلعب عسكر وحرامية

لعبة مملة مبهجة ويا القدر

فمتفكرنيش فارس منتصر

أنا يا دوبك بعدي بطراطيف الصوابع

على شروق بيتولد

ويزحف بحذر

على غروب عجوز

بيودع يوم طويل

لجل يزحف ليل جميل

شاب في ملامحه

يشيخ مع أول خيط للنور

يضرب في سور الليل

يعمل بقع

تزيد لحد العتمة ما تِنكْسر