مستغرب

مستغرب من ضحكتك

حقيقي مستغرب

مستغرب من عفاريت الفرحة في سحنتك !

أيوه مستغرب

أنت أزاي بتضحك

أنت أزاي بتفرح

ده تاريخ الظلم محفور ع ضهرك

ده قلم الجوع مطبوع على خدك

أنت أزاي مضغت الحزن؛ أنطق!

أزاي هضمته؛ يخرب بيتك!

أسف إني أهانتك؛ بجد أسف

بس حقيقي مستغرب

بص ف المرايا يا مجنون

عيونك غابوا عن وشك

دابوا في غربتك بكا

ولساك بتقول إن غاب الشوف يحلى السمع

يخرب بيتك!

أسف سعاتك

مهو أصلي مستغرب

بين صوابعك لساها ريحتها طالعة

أتكنش نسيتها

أديك بتقول مسك وعنبر

يعني واعي لموتها

أمال أزاي بتضحك

لسه بتضحك

باين لك أتجننت سعاتك

مروان محمد عبده